- 105 -

1335. Juli 25. Liegnitz.

Herzog Boleslaus verlegt den Bartholomäus - Markt in Liegnitz auf Aller-Heiligen.

In gotis namen amen. Wir Boleslaus von gotes genaden herczog von Slesien vnd herre zu Legnicz bekennen offinbar allen den, dy desin brif sehen adir horen lesen, das wir von vnsirr weysen manne rate mit wolbedachtem mute von vnsir furstlichen gewalt geben ewiklich zu genaden vnsern getrawen burgern zu Legnicz, der stad zu nucze vnd zu fromen, das sie den jarmarkt, der do vor gewest ist zu Legnicz uff sente Bartholomeus tag, sullen legen uff allir heiligen tag. Der selbige jarmarkt sal sten vnd weren ganczer acht tage vnd alle lewte, dy dar komen, dy do keuffen vnd vorkeuffin alles czolles sein frey vnd ledig vnd das das von unsern erben vnd nachkomen vnd zuvor von vns ewiklichen vngehinderth bleybe, gebin wir desen briff mit vnsirm wissen vorsigilt, mit vnsirm ingesigil zu geczeuge der vor geschriben rede, der gegebin ist zu Legnicz an sant Jacobs tage des heiligen zwelffboten, nach gotis geborth tausunt iar dreyhundirt iar in dem fumffvnddreysigisten iare. Des sint geczeuge vnse man, her Jeschke Buzuwoy, her Jeschke von Berndorff, Albrecht Beyer, Hannus von Rymberg, Hannus Schirmer, Heinrich von Landiscrona vnd Johannes von Schellendorff, vnse lantschreyber, der disen briff hat geschriben.

Altes Privilegb. p. 21. — Bitschens Privilegb. f. LXXX.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866